23.04.2025 - AKTIVITET TRAJNUES: “Kontrolli i akteve të shoqërisë tregtare, natyra e vendimmarrjes së gjykatës, konfliktet që lindin nga instituti i largimit dhe përjashtimit të ortakut”

Shkolla e Magjistraturës, më datë 23 prill 2025, zhvilloi aktivitetin trajnues me temë: “Paditë që lidhen me kontrollin e akteve të shoqërisë me natyrë konfliktet që lindin nga largimi dhe përjashtimi i ortakut. -Natyra e vendimmarrjes në “procedurën e brendshme” në largimin dhe përjashtimin e ortakut. -Kundërshtimi në gjykatë i vendimmarrjes së AP në rastin e largimit dhe përjashtimit të ortakut dhe natyra e vendimmarrjes së gjykatës. -Natyra e padive që lidhen me dëmshpërblimin/kompensimin financiar si në rastin e largimit ashtu dhe atë të përjashtimit nga shoqëria.”, pranë ambienteve të Shkollës së Magjistraturës, në Tiranë.

Ky aktivitet u drejtua nga: 

Ekspertë: Fatri Islamaj dhe Artan Hajdari

Lehtësuese: Arjeta Lika

Qëllimi i këtij trajnimi është: Aftësimi i gjyqtarëve pjesëmarrës në trajnim në lidhje me çështjet gjyqësore që lidhen me natyrën e padisë për përjashtimin e ortakut në një shoqëri me përgjegjësi të kufizuar dhe zgjidhjet praktike të kërkimeve për dëmshpërblim nga palët në proces.

Trajnimi u realizua duke ndërthurur prezantimet (deri në 20-30 min) me diskutimin e çështjeve të shtruara (pyetjeve vetë studimore; pyetje-përgjigje) dhe ushtrimeve me raste praktike & kuize, për të nxitur dhe realizuar ndërveprimin aktiv të pjesëmarrësve. 

Gjatë këtij aktiviteti trajnues u trajtuan tema të ndryshme, si: 

• Vështrim historik në lidhje me institutin e përjashtimit të ortakut sipas ligjit shqiptar. Krahasimi me sistemet e tjera të së drejtës tregtare dhe kompanive;
• Vendimmarrja e asamblesë për përjashtimin e ortakut. Çështje të procedurës dhe kuorumit në vendimmarrje. Shkaqet e përjashtimit të ortakut. Shkaqet ligjore dhe ato statutore;
• Padia për përjashtimin e ortakut. Çështje të legjitimit të palëve. Barra e provës;
• Padia e shoqërisë për t’i kërkuar ortakut të përjashtuar shpërblimin e demit;
• E drejta e ortakut për të kërkuar likuidimin e kuotës, kompensimin e kuotës dhe/ose kompensimin në raste e padisë së shoqërisë për shkaktim dëmi. Masat e sigurimit të padisë;
• Praktika gjyqësore parë në aspektin e vlefshmërinë e vendimeve të Asamblesë së Përgjithshme të Ortakëve dhe shkaqeve të përjashtimit të ortakëve.

Në këtë aktivitet trajnues morën pjesë gjyqtarë dhe ndihmës ligjorë të Republikës së Shqipërisë.